Biləsuvarda Şəhid bulağı...

Biləsuvarda Şəhid bulağı...

Biləsuvar rayonunun Aşağı Cürəli kəndində Vətən müharibəsi şəhidi, pilot baş leytenant Xalid Həsən oğlu Gözəlovun xatirəsinə inşa edilmiş bulağın açılışı olub.

Bulaq şəhidin ailəsi, döyüş yoldaşları və kəndin sakinləri tərəfindən tikilib.

Açılış mərasimində Biləsuvar Rayon İcra Hakimiyyətinin rəsmiləri, Dövlət Sərhəd Xidmətinin şəxsi heyəti, SHXÇDX-nin Biləsuvar rayon şöbəsinin əməkdaşları, kənd sakinləri, Aşağı Cürəli kənd tam orta məktəbinin şagirdləri və şəhidin doğmaları iştirak ediblər.

X.Gözəlov 4 noyabr 1996-ci ildə Biləsuvar rayonunun Aşağı Cürəli kəndində anadan olub. 2002-ci ildə Zaqatala şəhərində Ş.Qurbanov adına tam orta məktəbin 1-ci sinfinə getsə də, məktəbi doğulduğu kəndin orta məktəbində bitirib.

2012-2016-ci illərdə Dövlət Sərhəd Xidmətinin Akademiyasının Aviasiya fakültəsi üzrə təhsil alıb. 2016-ci ildən Dövlət Sərhəd Xidmətində baş leytenant hərbi rütbəsində pilot kimi xidmətə başlayıb.

X.Gözəlov Azərbaycan Respublikasının ərazi bütövlüyü uğrunda 27 sentyabr 2020-ci il tarixdə başlayan Vətən müharibəsində iştirak edib, xüsusi rəşadət göstərərək qəhrəmancasına şəhid olub.

Şəhidimiz 28 sentyabr 2020-ci ildə Bakı şəhərində II Fəxri xiyabanda dəfn edilib. Şəhid baş leytenant "Vətən uğrunda" medalı, 3-cü dərəcəli "Vətənə xidmətə görə" ordeni və "Qubadlının azad olunmasına görə medalı" ilə təltif edilib. Şəhidimiz nişanlı idi.

Allah rəhmət eləsin!